ಬೆಂಗಳೂರು, ಸೆಪ್ಟೆಂಬರ್ 16, 2025: ಬೆಂಗಳೂರು ಮೊಗವೀರ ಸಂಘ (ರಿಜಿಸ್ಟರ್ಡ್) ಇದರ ಆಡಳಿತ ಮಂಡಳಿಯ ನೂತನ ಅಧ್ಯಕ್ಷರಾಗಿ ಉದ್ಯಮಿ ಶಂಕರ್ ಕುಂದರ್ ಆಯ್ಕೆಯಾಗಿದ್ದಾರೆ. ಈ ಚುನಾವಣೆಯು ಸಂಘದ ಸದಸ್ಯರ ಒಗ್ಗಟ್ಟು ಮತ್ತು ಸಾಮಾಜಿಕ ಕಾರ್ಯಕ್ಷೇತ್ರದಲ್ಲಿ ಮುಂದುವರಿಯುವ ಉದ್ದೇಶವನ್ನು ಬಲಪಡಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.

ನೂತನ ಆಡಳಿತ ಮಂಡಳಿಯಲ್ಲಿ ಪ್ರಧಾನ ಕಾರ್ಯದರ್ಶಿಯಾಗಿ ಲೋಹಿತ್ ಕೆ ಕಾಂಚನ್ ಆಯ್ಕೆಯಾಗಿದ್ದಾರೆ. ಉಪಾಧ್ಯಕ್ಷರಾಗಿ ಉದಯ್ ಕಾವ್ರಾಡಿ ಮತ್ತು ರವೀಂದ್ರ ಕುಂದರ್, ಕೋಶಾಧಿಕಾರಿಯಾಗಿ ಗೌರೀಶ್ ಕಟೀಲ್, ಸಹಕೋಶಾಧಿಕಾರಿಯಾಗಿ ರಾಘವೇಂದ್ರ ಕುಂದರ್ ಆಯ್ಕೆಯಾಗಿದ್ದಾರೆ. ಕಾರ್ಯಕಾರಿ ಸಮಿತಿ ಸದಸ್ಯರಾಗಿ ಗುಣಕರ್ ಕೆ, ಚೇತನ್ ಜಿ, ಉಮೇಶ್ ಕುಂದರ್, ಸುಧಾಕರ ಸೂರಲ್, ನಿತಿನ್ ಕಾಂಚನ್, ರಾಜು ಶ್ರೀಯಾನ್, ಮತ್ತು ಸುನಿಲ್ ಸುವರ್ಣ ಆಯ್ಕೆಯಾಗಿದ್ದಾರೆ.

ಬೆಂಗಳೂರು ಮೊಗವೀರ ಸಂಘವು 1973ರಲ್ಲಿ ಸ್ಥಾಪನೆಯಾಗಿ, 1974-75ರಲ್ಲಿ ನೋಂದಣಿಗೊಂಡು, ಕಳೆದ ನಾಲ್ಕು ದಶಕಗಳಿಂದ ಮೊಗವೀರ ಸಮುದಾಯದ ಒಗ್ಗಟ್ಟು ಮತ್ತು ಶ್ರೇಯೋಭಿವೃದ್ಧಿಗಾಗಿ ಕಾರ್ಯನಿರ್ವಹಿಸುತ್ತಿದೆ. ಉದ್ಯೋಗ ಮಾಹಿತಿ, ವಿವಾಹ ಸಂಬಂಧಿ ಸಲಹೆ, ಬಡ ವಿದ್ಯಾರ್ಥಿಗಳಿಗೆ ಆರ್ಥಿಕ ಸಹಾಯ, ಸಾಂಸ್ಕೃತಿಕ ಕಾರ್ಯಕ್ರಮಗಳು, ಕ್ರೀಡಾ ಚಟುವಟಿಕೆಗಳು, ಮತ್ತು ರಕ್ತದಾನ ಶಿಬಿರಗಳಂತಹ ಕಾರ್ಯಕ್ರಮಗಳ ಮೂಲಕ ಸಂಘವು ಸಮುದಾಯದ ಸದಸ್ಯರಿಗೆ ಸೇವೆ ಸಲ್ಲಿಸುತ್ತಿದೆ.