ಗಂಗೊಳ್ಳಿ, ಸೆಪ್ಟೆಂಬರ್ 05, 2025: ಕುಂದಾಪುರ ತಾಲೂಕಿನ ಕರಾವಳಿ ಪಟ್ಟಣವಾದ ಗಂಗೊಳ್ಳಿಯಲ್ಲಿ ಪ್ರವಾದಿ ಮಹಮ್ಮದ್ ಪೈಗಂಬರ್ ಅವರ 1500ನೇ ಜನ್ಮದಿನದ ಮೀಲಾದುನ್ನಬಿ ಆಚರಣೆಗೆ ಭರದ ಸಿದ್ಧತೆ ನಡೆಯುತ್ತಿದೆ. ಈ ವರ್ಷ ಈದ್ ಮಿಲಾದ್ ಉನ್ ನಬಿ ಶುಕ್ರವಾರವಾದ ಕಾರಣ, ಆಚರಣೆಯನ್ನು ಸೆಪ್ಟೆಂಬರ್ 7 ರ ಭಾನುವಾರಕ್ಕೆ ಸ್ಥಳಾಂತರಿಸಲಾಗಿದೆ.

ಗಂಗೊಳ್ಳಿಯ ಬೀದಿಗಳು ದೀಪಗಳು, ಬ್ಯಾನರ್‌ಗಳು ಮತ್ತು ಹಬ್ಬದ ಅಲಂಕಾರಗಳಿಂದ ಅಲಂಕರಿಸಲ್ಪಟ್ಟಿವೆ. ಜಾಮೀಯಾ ಮೊಹಲ್ಲಾವು ರಂಗುರಂಗಿನ ದೀಪಗಳಿಂದ ಸಿಂಗಾರಗೊಂಡಿದ್ದು. ಸುಲ್ತಾನ್ ಮೊಹಲ್ಲಾ ಡಫ್ ತಂಡ, ಕಲಂದರ್ ಶಾಹ್ ದಫ್ಫ್ ಕಮಿಟಿ ಮಣಿಪುರ ಕಾಪು, ನೂರುಲ್ ಹುದಾ ದಫ್ಫ್ ಕಮಿಟಿ ಕೋಡಿ ಹಾಗು ಶಿರೂರಿನ ದಫ್ಫ್ ತಂಡದ ಭಾನುವಾರದ ಮೆರವಣಿಗೆಯ ಪ್ರದರ್ಶನವು ಎಲ್ಲರ ಗಮನ ಸೆಳೆಯಲಿದೆ. ಮೆರವಣಿಗೆ ಜಾಮೀಯಾ ಮೊಹಲ್ಲಾದಿಂದ ಆರಂಭವಾಗಿ, ಮುಖ್ಯ ರಸ್ತೆಯ ಮೂಲಕ ಗಂಗೊಳ್ಳಿಯ ಕೊನೆಯ ಬಸ್ ನಿಲ್ದಾಣಕ್ಕೆ, ಬದರಿಯಾ ಮೊಹಲ್ಲಾ ಮೂಲಕ ಮರಳಿ ಬರಲಿದೆ. ಸಮುದಾಯದ ಸದಸ್ಯರು ಬ್ಯಾನರ್‌ಗಳನ್ನು ಅಳವಡಿಸಿ, ಭಕ್ತಿಯಿಂದ ತಮ್ಮ ಬೆಂಬಲವನ್ನು ತೋರಿಸಿದ್ದಾರೆ.

ಈದ್ ಮೀಲಾದ್ ಸಮಿತಿಯ ಅಧ್ಯಕ್ಷ ಅಬ್ದುಲ್ ರಶೀದ್ (ಸುಲ್ತಾನ್ ಮೊಹಲ್ಲಾ), ಉಪಾಧ್ಯಕ್ಷ ಇಬ್ರಾಹಿಂ ಖಲೀಲ್ (ಜಾಮೀಯಾ ಮೊಹಲ್ಲಾ), ಕಾರ್ಯದರ್ಶಿ ಫವಾಝ್ ಖಲೀಫೆ (ಮುಬಾರಕ್ ಮೊಹಲ್ಲಾ), ಜಂಟಿ ಕಾರ್ಯದರ್ಶಿ ಝಹೀರ್ ಅಹ್ಮದ್ ನಾಖುದಾ (ನಾಖುದಾ ಮೊಹಲ್ಲಾ), ಮತ್ತು ಖಜಾಂಚಿ ಮೊಹಮ್ಮದ್ ಜಲಾಲ್ (ರೆಹಮಾನಿಯಾ ಮೊಹಲ್ಲಾ) ಈ ಕಾರ್ಯಕ್ರಮದ ವ್ಯವಸ್ಥೆಯನ್ನು ಮುನ್ನಡೆಸುತ್ತಿದ್ದಾರೆ. ಗಂಗೊಳ್ಳಿಯ ಯುವಕರು ಮತ್ತು ಹಿರಿಯರು ಉತ್ಸಾಹದಿಂದ ಭಾಗವಹಿಸಿ, ಪಟ್ಟಣಕ್ಕೆ ಹಬ್ಬದ ವಾತಾವರಣ ತಂದಿದ್ದಾರೆ.

1500ನೇ ವರ್ಷದ ವಿಶೇಷ ಸಂದರ್ಭವಾಗಿ, ಈ ಆಚರಣೆ ಗಂಗೊಳ್ಳಿಯ ಮುಸ್ಲಿಂ ಸಮುದಾಯಕ್ಕೆ ಮಹತ್ವದ್ದಾಗಿದೆ. ಮೆರವಣಿಗೆ ಮತ್ತು ಕಾರ್ಯಕ್ರಮಗಳು ದೊಡ್ಡ ಸಂಖ್ಯೆಯ ಜನರನ್ನು ಆಕರ್ಷಿಸಿ, ಒಗ್ಗಟ್ಟು ಮತ್ತು ಪ್ರವಾದಿಯವರ ಬೋಧನೆಗಳಿಗೆ ಗೌರವ ಸೂಚಿಸಲಿವೆ.