ಕುಂದಾಪುರ, ಸೆ.11, 2025: ಕುಂದಾಪುರ ತಾಲೂಕಿನ ಕಾಳಾವರ ಗ್ರಾಮದ ರೈಲ್ವೆ ಬ್ರಿಡ್ಜ್ ಕೆಳಗೆ ರೈಲ್ವೆ ಟ್ರಾಕ್‌ನ ಕಿಲೋಮೀಟರ್ ಸಂಖ್ಯೆ 662/14-16 ಮತ್ತು 662/4-5ರಲ್ಲಿ ಸೆಪ್ಟೆಂಬರ್ 11, 2025ರ ಸಂಜೆ 5:10ಕ್ಕೆ ವ್ಯಕ್ತಿಯೊಬ್ಬ ರೈಲಿಗೆ ಸಿಲುಕಿ ಮೃತಪಟ್ಟ ಘಟನೆ ನಡೆದಿದೆ. ಮುರ್ಡೇಶ್ವರದಿಂದ ಕಾಂಚಿಕೋಡ್‌ಗೆ ಸಾಗುತ್ತಿದ್ದ ರೈಲು ಸಂಖ್ಯೆ 12790 ಡೌನ್ ಎಕ್ಸ್‌ಪ್ರೆಸ್ ರೈಲಿಗೆ ವ್ಯಕ್ತಿ ಸಿಲುಕಿದ್ದಾನೆ ಎಂದು ರೈಲ್ವೆ ಸಿಬ್ಬಂದಿ ಸ್ಟೇಷನ್ ಮಾಸ್ಟರ್‌ಗೆ ಮಾಹಿತಿ ನೀಡಿದ್ದಾರೆ.

ಕಾಳಾವರ ಗ್ರಾಮದ ರಾಘವೇಂದ್ರ (49) ಎಂಬುವವರು ಈ ಘಟನೆಯ ಪಿರ್ಯಾದಿದಾರರಾಗಿದ್ದು, ಸೀನಿಯರ್ ಸೆಕ್ಷನ್ ಇಂಜಿನಿಯರ್ ವೀರೇಶ್ ಅವರು ಫೋನ್ ಮೂಲಕ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ರಾಘವೇಂದ್ರ ಸ್ಥಳಕ್ಕೆ ತೆರಳಿ ಪರಿಶೀಲಿಸಿದಾಗ, ರೈಲ್ವೆ ಹಳಿಯ ಮಧ್ಯದಲ್ಲಿ ಗಂಡಸಿನ ಮೃತದೇಹ ಬಿದ್ದಿರುವುದು ಕಂಡುಬಂದಿದೆ. ಸ್ಥಳೀಯರ ಸಹಾಯದಿಂದ ಮೃತದೇಹವನ್ನು ಹಳಿಯಿಂದ ಎತ್ತಿ ಬದಿಗಿಟ್ಟಾಗ, ತಲೆ ಛಿದ್ರವಾಗಿದ್ದು, ಎರಡೂ ಕಾಲು ಮತ್ತು ಕೈಗಳು ಹುಡಿಯಾಗಿರುವುದು ಗೊತ್ತಾಗಿದೆ.

ಮೃತ ವ್ಯಕ್ತಿ ಸುಮಾರು 35-40 ವರ್ಷ ವಯಸ್ಸಿನವನಾಗಿದ್ದು, ನೀಲಿ ಜೀನ್ಸ್ ಮತ್ತು ಕಾಫಿ ಬಣ್ಣದ ತುಂಬು ತೋಳಿನ ಶರ್ಟ್ ಧರಿಸಿದ್ದಾನೆ. ಗಡ್ಡವಿರುವ ಈ ವ್ಯಕ್ತಿಯ ಗುರುತು ಇನ್ನೂ ದೃಢಪಟ್ಟಿಲ್ಲ. ಪ್ರಾಥಮಿಕ ತನಿಖೆಯಲ್ಲಿ ರೈಲಿಗೆ ಅಡ್ಡಬಂದು ಆತ್ಮಹತ್ಯೆ ಮಾಡಿಕೊಂಡಿರುವಂತೆ ಕಂಡುಬಂದಿದೆ. ಈ ಘಟನೆಯ ಬಗ್ಗೆ ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಯುಡಿಆರ್ ಕ್ರಮಾಂಕ 31/2025, ಕಲಂ 194 BNSS ರಂತೆ ಪ್ರಕರಣ ದಾಖಲಾಗಿದೆ.