ಕಾರವಾರ, ಸೆಪ್ಟೆಂಬರ್ 20, 2025: ರೈಲಿನಿಂದ ಬಿದ್ದು ಗಂಭೀರವಾಗಿ ಗಾಯಗೊಂಡಿದ್ದ ನೌಕಾನೆಲೆ ಅಧಿಕಾರಿಯನ್ನು ರಕ್ಷಣೆ ಮಾಡಿದ ಕಾರವಾರದ ಯುವಕ ನಾಗಪ್ರಸಾದ್ ರಾಯ್ಕರ್ ಅವರನ್ನು ಐಎನ್‌ಎಸ್ ತಬರ್ ನೌಕೆಯ ಸಿಬ್ಬಂದಿ ಸನ್ಮಾನಿಸಿದ್ದಾರೆ. ಆಗಸ್ಟ್ 1ರಂದು ಶಿರವಾಡದ ಮಾರುತಿ ದೇವಸ್ಥಾನದ ಬಳಿ ರೈಲು ಹಳಿಯ ಮೇಲೆ ಬಿದ್ದಿದ್ದ ಐಎನ್‌ಎಸ್ ತಬರ್ ನೌಕೆಯ ಅಧಿಕಾರಿ ಸಕೇತ್ ಕಶ್ಯಪ್ ಅವರನ್ನು ನಾಗಪ್ರಸಾದ್ ರಕ್ಷಿಸಿ ಜಿಲ್ಲಾ ಆಸ್ಪತ್ರೆಗೆ ಕರೆತಂದಿದ್ದರು.
ನಗರದ ನಂದನಗದ್ದ ಬಡಾವಣೆಯ ಬಂಗಾರದ ಕೆಲಸ ಮಾಡುವ ನಾಗಪ್ರಸಾದ್ ರಾಯ್ಕರ್ ಅವರು, ರೈಲು ಹಳಿಯ ಮೇಲೆ ರಕ್ತಸಿಕ್ತನಾಗಿ ಬಿದ್ದಿದ್ದ ಅಧಿಕಾರಿಯನ್ನು ಗಮನಿಸಿ, ಜ್ಞಾನ ತಪ್ಪಿದ್ದ ಅವರನ್ನು ಬೈಕ್‌ನಲ್ಲಿ ಕೂರಿಸಿಕೊಂಡು ಜಿಲ್ಲಾ ಆಸ್ಪತ್ರೆಗೆ ಕರೆತಂದಿದ್ದರು. ರಕ್ತಸ್ರಾವವನ್ನು ನಿಲ್ಲಿಸದೇ ಚಿಕಿತ್ಸೆಗೆ ಒಳಪಡಿಸಿ, ಶಸ್ತ್ರಚಿಕಿತ್ಸೆಗೊಳಪಡಿಸಿದ್ದರು. ವಿಷಯ ತಿಳಿದ ನೌಕಾನೆಲೆ ಅಧಿಕಾರಿಗಳು ಆಸ್ಪತ್ರೆಗೆ ಬಂದು ಅಧಿಕಾರಿಯನ್ನು ಪತಂಜಲಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ಮುಂದುವರೆಸಿದ್ದರು.
ಗುಣಮುಖನಾದ ಅಧಿಕಾರಿ ಸಕೇತ್ ಕಶ್ಯಪ್ ಅವರಿಂದ ಸಂಪರ್ಕ ಕೂಡಿದ ನಾಗಪ್ರಸಾದ್ ಅವರನ್ನು ಬುಧವಾರ ಕದಂಬ ನೌಕಾನೆಲೆಗೆ ಆಹ್ವಾನಿಸಲಾಯಿತು. ಮುಂಬೈಯಿಂದ ಹಿಂದಿರುಗಿದ ಐಎನ್‌ಎಸ್ ತಬರ್ ನೌಕೆಯ ಸಿಬ್ಬಂದಿ ಸಮ್ಮುಖದಲ್ಲಿ ನಾಗಪ್ರಸಾದ್ ಅವರನ್ನು ಸನ್ಮಾನಿಸಿ ಉಡುಗೊರೆಗಳು ನೀಡಿದ್ದಾರೆ. ದೇಶ ರಕ್ಷಣೆಗೆ ಸೇವೆ ಸಲ್ಲಿಸುವ ನೌಕಾನೆಲೆ ಅಧಿಕಾರಿಯನ್ನು ರಕ್ಷಿಸಿದ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿ, ಪ್ರತಿ ತಿಂಗಳು ನೌಕೆಯಲ್ಲಿ ಉತ್ತಮ ಕೆಲಸ ಮಾಡುವ ಸಿಬ್ಬಂದಿಗೆ ನೀಡುವ ‘ಗಬ್ಬರ್ ಸಿಂಗ್’ ಪ್ರಶಸ್ತಿಯನ್ನು ಈ ಬಾರಿ ನಾಗಪ್ರಸಾದ್ ಅವರಿಗೆ ನೀಡಿ ಗೌರವಿಸಲಾಗಿದೆ.
“ಜೀವನದಲ್ಲಿ ರಕ್ಷಣೆ ಮಾಡುವ ಅವಕಾಶ ಸಿಕ್ಕಾಗ ಹೆದರದೆ ನೌಕಾನೆಲೆ ಅಧಿಕಾರಿಯನ್ನು ಉಳಿಸಿದ್ದೇನೆ. ಅದರ ಪ್ರತಿಫಲವಾಗಿ ಸನ್ಮಾನ ದೊರೆತಿದ್ದು, ನನ್ನ ಜೀವನದಲ್ಲಿ ಸಿಕ್ಕ ಅತ್ಯುನ್ನತ ಅವಕಾಶ” ಎಂದು ನಾಗಪ್ರಸಾದ್ ರಾಯ್ಕರ್ ಹೇಳಿದ್ದಾರೆ.
