ಕುಂದಾಪುರ, ಸೆಪ್ಟೆಂಬರ್ 03, 2025: ಕುಂದಾಪುರದ ಮಲ್ನಾಡ್ ಪೆಟ್ರೋಲ್ ಬಂಕ್ ಬಳಿಯ ಆರ್‌ಆರ್ ಪ್ಲಾಝಾ ಸಮೀಪ ಸೆಪ್ಟೆಂಬರ್ 2, 2025ರ ಸಂಜೆ 6:30ಕ್ಕೆ ಸಂದೀಪ್ ಕುಮಾರ್ ಎಂಬವರಿಗೆ ದರೋಡೆ ಮತ್ತು ಹಲ್ಲೆ ಎಸಗಿದ ಆರೋಪದ ಮೇಲೆ ಆರು ಜನರನ್ನು ಕುಂದಾಪುರ ಪೊಲೀಸರು ದಸ್ತಗಿರಿ ಮಾಡಿದ್ದಾರೆ. ಆರೋಪಿಗಳಾದ ಆಸ್ಮಾ (43), ಸವದ್ ಯಾನೆ ಅಚ್ಚು (28), ಸೈಪುಲ್ಲಾ (38), ಮೊಹಮ್ಮದ್ ನಾಸೀರ್ ಶರೀಫ್ (36), ಅಬ್ದುಲ್ ಸತ್ತಾರ್ (23), ಮತ್ತು ಅಬ್ದುಲ್ ಅಜೀಜ್ (26) ಈ ಕೃತ್ಯದಲ್ಲಿ ಭಾಗಿಯಾಗಿದ್ದಾರೆ.
ಪಿರ್ಯಾದಿದಾರ ಸಂದೀಪ್ ಕುಮಾರ್, ಮೂರು ತಿಂಗಳ ಹಿಂದೆ ಕುಂದಾಪುರಕ್ಕೆ ಬಂದಾಗ ಆರೋಪಿ ಸವದ್‌ನ ಪರಿಚಯವಾಗಿತ್ತು. ಸವದ್, ಆಸ್ಮಾಳನ್ನು ಪರಿಚಯಿಸಿ, ಆಕೆಯೊಂದಿಗೆ ಲೈಂಗಿಕ ಸಂಪರ್ಕಕ್ಕೆ ಅವಕಾಶವಿದೆ ಎಂದು ತಿಳಿಸಿದ್ದ. ಆಸ್ಮಾ ಕರೆದಾಗ ಸಂದೀಪ್ ಸೆಪ್ಟೆಂಬರ್ 2ರಂದು ಆರ್‌ಆರ್ ಪ್ಲಾಝಾಕ್ಕೆ ಆಟೋ ರಿಕ್ಷಾದಲ್ಲಿ ಬಂದಿದ್ದರು. ಆಸ್ಮಾ ಅವರನ್ನು ತನ್ನ ಮನೆಗೆ ಕರೆದೊಯ್ದು, ಉಳಿದ ಆರೋಪಿಗಳನ್ನು ಕರೆಯಿಸಿದ್ದಳು. ಆರೋಪಿ ಮೊಹಮ್ಮದ್ ನಾಸೀರ್ ಶರೀಫ್, ಚಾಕು ತೋರಿಸಿ ₹3 ಲಕ್ಷ ಕೊಡುವಂತೆ ಬೆದರಿಸಿದ್ದಾನೆ.
ಸಂದೀಪ್ ಓಡಲು ಯತ್ನಿಸಿದಾಗ, ಆರೋಪಿಗಳು ಅವರ ಕೈಗಳನ್ನು ನೈಲಾನ್ ಹಗ್ಗದಿಂದ ಕಟ್ಟಿ, ಕೈಯಿಂದ ಹೊಡೆದಿದ್ದಾರೆ. ಆರೋಪಿ ಸೈಪುಲ್ಲಾ, ರಾಡ್‌ನಿಂದ ಸಂದೀಪ್‌ರ ಎಡ ಭುಜ ಮತ್ತು ಬೆನ್ನಿಗೆ ಹೊಡೆದಿದ್ದಾನೆ. ಆರೋಪಿಗಳು ಸಂದೀಪ್‌ರ ಜೇಬಿನಿಂದ ₹6,200 ಕಸಿದುಕೊಂಡು, ಗೂಗಲ್ ಪೇ ಮೂಲಕ ₹5,000, ₹10,000, ಮತ್ತು ₹20,000 ವರ್ಗಾಯಿಸಲು ಒತ್ತಾಯಿಸಿದ್ದಾರೆ. ನಂತರ, ಸಂದೀಪ್‌ರ ಎಸ್‌ಬಿಐ ಎಟಿಎಂ ಕಾರ್ಡ್‌ನ ಪಿನ್ ಪಡೆದು ₹40,000 ಡ್ರಾ ಮಾಡಿ, ಕಾರ್ಡ್ ಮತ್ತು ಹಣವನ್ನು ಇಟ್ಟುಕೊಂಡಿದ್ದಾರೆ. ರಾತ್ರಿ 11:30ಕ್ಕೆ ಆರೋಪಿಗಳು “ನಿನ್ನನ್ನು ಕೊಂದು ಹಾಕುತ್ತೇವೆ” ಎಂದು ಬೆದರಿಸಿ ಸಂದೀಪ್‌ರನ್ನು ಬಿಟ್ಟಿದ್ದಾರೆ.
ಸಂದೀಪ್ ಕುಮಾರ್‌ರ ದೂರಿನ ಮೇರೆಗೆ ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 109/2025ರಡಿ ಕಲಂ 140(2), 310(2), 115(2), 118(1), 127(2), 352, 351(2) BNS ರಂತೆ ಪ್ರಕರಣ ದಾಖಲಾಗಿದೆ. ಉಡುಪಿ ಪೊಲೀಸ್ ಅಧೀಕ್ಷಕ ಹರಿರಾಮ್ ಶಂಕರ (ಐಪಿಎಸ್) ಆದೇಶದಂತೆ, ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಸುಧಾಕರ ನಾಯ್ಕ ಮತ್ತು ಉಪಾಧೀಕ್ಷಕ ಎಚ್‌.ಡಿ. ಕುಲಕರ್ಣಿ ಮಾರ್ಗದರ್ಶನದಲ್ಲಿ, ಪಿಎಸ್‌ಐ ನಂಜಾನಾಯ್ಕ ಎನ್, ಶ್ರೀಮತಿ ಪುಷ್ಪ, ಮತ್ತು ಸಿಬ್ಬಂದಿಗಳಾದ ಪ್ರೀನ್ಸ್, ಘನಶ್ಯಾಮ್, ರಾಜು, ನಾಗೇಶ, ಮಹಾಬಲ, ರಾಘವೇಂದ್ರ, ಗೌತಮ್, ಭಾಗಿರತಿ, ನಾಗಶ್ರೀ, ಮತ್ತು ರೇವತಿ ಕಾರ್ಯಾಚರಣೆಯಲ್ಲಿ ಭಾಗವಹಿಸಿ, ಕೋಟೇಶ್ವರ ಗ್ರಾಮದಲ್ಲಿ ಆರೋಪಿಗಳನ್ನು ವಶಕ್ಕೆ ಪಡೆದಿದ್ದಾರೆ.
ದಸ್ತಗಿರಿಯಾದ ಆರೋಪಿಗಳು:
- ಸವದ್ ಯಾನೆ ಅಚ್ಚು (28), ವಾಸ: ಕಟ್ಟೆಬಾಗಿಲು, ಬಡಾಕೆರೆ, ನಾವುಂದ, ಬೈಂದೂರು.
- ಸೈಪುಲ್ಲಾ (38), ವಾಸ: ಗಾಂಧೀ ಕಟ್ಟೆ, ಗುಲ್ವಾಡಿ, ಕುಂದಾಪುರ.
- ಮೊಹಮ್ಮದ್ ನಾಸೀರ್ ಶರೀಫ್ (36), ವಾಸ: ಜೂಲಿಯೋ ರೆಸಿಡೆನ್ಸಿ, ಹಂಗಳೂರು, ಕುಂದಾಪುರ.
- ಅಬ್ದುಲ್ ಸತ್ತಾರ್ (23), ವಾಸ: ಜನತಾ ಕಾಲೋನಿ, ಮೂಡುಗೋಪಾಡಿ, ಕುಂಭಾಶಿ, ಕುಂದಾಪುರ.
- ಅಬ್ದುಲ್ ಅಜೀಜ್ (26), ವಾಸ: ಕೊಲ್ಲೂರು ಮುಖ್ಯ ರಸ್ತೆ, ನಾಗೋಡಿ, ಹೊಸನಗರ, ಶಿವಮೊಗ್ಗ.
- ಆಸ್ಮಾ (43), ವಾಸ: ಮಿಸ್ಪಾ ಮಂಜಿಲ್, ಎಂ ಕೋಡಿ, ಕುಂದಾಪುರ; ಹಾಲಿ ವಾಸ: ಗೋಪಾಡಿ, ಕುಂದಾಪುರ.
ವಶಪಡಿಸಿಕೊಂಡ ವಸ್ತುಗಳು:
ಕೃತ್ಯಕ್ಕೆ ಬಳಸಿದ ಕಾರುಗಳು:
- KA 20 MD 7072 (ಮೌಲ್ಯ ₹10,00,000).
- KA 20 ME 0272 (ಮೌಲ್ಯ ₹8,00,000).
ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸಿ, ಸುಲಿಗೆ ಎಸಗಿರುವುದು ದೃಢಪಟ್ಟಿದ್ದು, ಇವರನ್ನು ಮಾನ್ಯ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.
