ಮಲ್ಪೆ, ಸೆಪ್ಟೆಂಬರ್ 06, 2025: ಉಡುಪಿ ಜಿಲ್ಲೆಯ ಮಲ್ಪೆಯ ಪಡುತೋನ್ಸೆ ಗ್ರಾಮದ ಗುಜ್ಜರಬೆಟ್ಟುವಿನ ಕೆಎಂಪಿ ರಸ್ತೆಯಲ್ಲಿರುವ ಶ್ರೀ ಬೊಬ್ಬರ್ಯ ದೈವಸ್ಥಾನದ ಬಳಿ ಮಾದಕ ವಸ್ತು ಮಾರಾಟ ಮಾಡುತ್ತಿದ್ದ ಮೂವರು ಆರೋಪಿಗಳನ್ನು ಮಲ್ಪೆ ಪೊಲೀಸರು ಸೆಪ್ಟೆಂಬರ್ 5ರ ಸಂಜೆ ಬಂಧಿಸಿದ್ದಾರೆ.

ಬಂಧಿತ ಆರೋಪಿಗಳು ಮಂಗಳೂರು ಉರ್ವ ಬೋಳೂರಿನ ಅಚ್ಚುತ ಎನ್. (ಕಿರಣ್ ಮೆಂಡನ್, 45), ಗುಜ್ಜರಬೆಟ್ಟುವಿನ ಪುನೀತ್ (ಪುನೀತ್ ರಾಜ್, 24), ಮತ್ತು ಒಡಿಶಾ ಮೂಲದ, ಪ್ರಸ್ತುತ ಪಡುತೋನ್ಸೆಯ ನಿವಾಸಿ ಚಂದ್ರಕಾಂತ ಕಟ್ವಾ ಎಂದು ಗುರುತಿಸಲಾಗಿದೆ. ಕೊಳಲಗಿರಿಯ ಕಿಶೋರ್ ಎಂಬಾತ ಪೊಲೀಸರ ದಾಳಿ ವೇಳೆ ಪರಾರಿಯಾಗಿದ್ದಾನೆ.

ಆರೋಪಿಗಳು ಬೈಕ್‌ನಲ್ಲಿ ಅಕ್ರಮವಾಗಿ ಗಾಂಜಾ ಮತ್ತು ಎಂಡಿಎಂಎ ಮಾರಾಟ ಮಾಡುತ್ತಿರುವ ಬಗ್ಗೆ ಮಾಹಿತಿ ಪಡೆದ ಪೊಲೀಸರು ದಾಳಿ ನಡೆಸಿದರು. ಈ ವೇಳೆ ಒಬ್ಬ ಆರೋಪಿ ಓಡಿಹೋದರೂ, ಉಳಿದ ಮೂವರನ್ನು ವಶಕ್ಕೆ ಪಡೆಯಲಾಗಿದೆ. ಬಂಧಿತರಿಂದ 3.48 ಗ್ರಾಂ ಗಾಂಜಾ (₹3,000 ಮೌಲ್ಯ), ₹10,000 ಮೌಲ್ಯದ ಎಂಡಿಎಂಎ, ಮತ್ತು ₹1,50,000 ಮೌಲ್ಯದ ಬೈಕ್‌ನ್ನು ವಶಪಡಿಸಿಕೊಳ್ಳಲಾಗಿದೆ.

ಈ ಕುರಿತು ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪರಾರಿಯಾದ ಕಿಶೋರ್‌ನ ಪತ್ತೆಗಾಗಿ ಶೋಧ ಕಾರ್ಯ ನಡೆಯುತ್ತಿದೆ.