ಮಣಿಪಾಲ, ಆಗಸ್ಟ್ 29, 2025:
ಮಣಿಪಾಲದ ಸುಂದರ್ (75) ಎಂಬವರು ಆಗಸ್ಟ್ 20, 2025 ರಂದು ಮುಂಬೈನಲ್ಲಿರುವ ಬಾವನಿಗೆ ಚೆಕ್ ರಿಕ್ವೆಸ್ಟ್ ಸ್ಲಿಪ್ ಅನ್ನು ಸ್ಪೀಡ್ ಪೋಸ್ಟ್ ಮೂಲಕ ಕಳುಹಿಸಿದ್ದರು. ಆದರೆ, ಆಗಸ್ಟ್ 26, 2025 ರವರೆಗೆ ಅದು ತಲುಪಿರಲಿಲ್ಲ. ಇದೇ ದಿನ 14:00 ಗಂಟೆಗೆ ಸುಂದರ್ ಅವರು ಆನ್‌ಲೈನ್‌ನಲ್ಲಿ ಸ್ಪೀಡ್ ಪೋಸ್ಟ್ ಆಫೀಸ್‌ನ ಸಂಖ್ಯೆಯನ್ನು ಹುಡುಕಿ ಕರೆ ಮಾಡಿದಾಗ, ಅವರಿಗೆ ಒಂದು ಸಂಖ್ಯೆಗೆ ಕರೆ ಮಾಡಲು ಸೂಚಿಸಲಾಯಿತು. ಆ ಸಂಖ್ಯೆಯವರು “ಪೋಸ್ಟ್ ಕಳುಹಿಸಲು 5 ರೂಪಾಯಿ ಕಡಿಮೆ ಇದೆ, ಆನ್‌ಲೈನ್ ಮೂಲಕ ಪಾವತಿಸಿ” ಎಂದು ತಿಳಿಸಿದರು. ಸುಂದರ್ ಅವರು ಸೂಚನೆಯಂತೆ ಹಣವನ್ನು ಪಾವತಿಸಿದರೂ, ಅವರಿಗೆ ತಿಳಿಯದಂತೆ ಅವರ ಬ್ಯಾಂಕ್ ಖಾತೆಯಿಂದ 1,50,000 ರೂಪಾಯಿಗಳನ್ನು ವರ್ಗಾಯಿಸಿಕೊಂಡು ವಂಚನೆ ಮಾಡಲಾಗಿದೆ. ಈ ಬಗ್ಗೆ ಮಣಿಪಾಲ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 154/2025, ಕಲಂ 66(C), 66(D) IT Act ಮತ್ತು 316(2) BNS ರಂತೆ ಪ್ರಕರಣ ದಾಖಲಾಗಿದೆ.

ಮಲ್ಪೆ, ಆಗಸ್ಟ್ 29, 2025:
ಮಲ್ಪೆಯ ಮೂಯಿಮ್ (25) ಎಂಬವರಿಗೆ ಆಗಸ್ಟ್ 24, 2025 ರಂದು ಟೆಲಿಗ್ರಾಮ್ ಆಪ್ ಮೂಲಕ ಪೂನಂ ಎಂಬ ಹೆಸರಿನಲ್ಲಿ “ಮನೆಯಿಂದಲೇ ಕೆಲಸ ಮಾಡಿ ಹೆಚ್ಚಿನ ಹಣ ಗಳಿಸಿ” ಎಂದು ಸಂದೇಶ ಬಂದಿತ್ತು. ಸಂದೇಶದಂತೆ ಮೂಯಿಮ್ ಅವರು ತಮ್ಮ ಹೆಸರು, ವಿಳಾಸ, ಮತ್ತು ಬ್ಯಾಂಕ್ ವಿವರಗಳನ್ನು ನೀಡಿದರು. ಬಳಿಕ, ಒಂದು ಗ್ರೂಪ್‌ಗೆ ಸೇರಲು ಲಿಂಕ್ ಕಳುಹಿಸಲಾಯಿತು, ಜೊತೆಗೆ ಟಾಸ್ಕ್‌ಗಳನ್ನು ಪೂರ್ಣಗೊಳಿಸಿದರೆ 20 ರೂಪಾಯಿ ನೀಡುವುದಾಗಿ ತಿಳಿಸಲಾಯಿತು. ಮೂಯಿಮ್ ಅವರು 10 ಟಾಸ್ಕ್‌ಗಳನ್ನು ಪೂರ್ಣಗೊಳಿಸಿ 900 ರೂಪಾಯಿ ಪಡೆದರು. ನಂತರ, 5,000 ರೂಪಾಯಿ ಮತ್ತು 2,000 ರೂಪಾಯಿ ಐಸಿಐಸಿಐ ಬ್ಯಾಂಕ್ ಖಾತೆಯಿಂದ ಆನ್‌ಲೈನ್‌ನಲ್ಲಿ ಪಾವತಿಸಿದರು, ಆಗ 9,100 ರೂಪಾಯಿ ಖಾತೆಗೆ ಬಂದಿತು. ಆಗಸ್ಟ್ 25 ರಂದು ಮತ್ತೊಂದು ಲಿಂಕ್ ಕಳುಹಿಸಿ, ಗ್ರೂಪ್‌ಗೆ ಸೇರಲು ತಿಳಿಸಲಾಯಿತು, ಮತ್ತು 800 ರೂಪಾಯಿ ಖಾತೆಗೆ ಬಂದಿತು. ಆಗಸ್ಟ್ 26 ರಂದು ರೂಜಾನಿ ಮತ್ತು ಕೃಷ್ಣ ಎಂಬವರಿಂದ ಬಂದ ಲಿಂಕ್‌ಗಳ ಮೂಲಕ ಯೂಸರ್ ಐಡಿ ಮತ್ತು ಪಾಸ್‌ವರ್ಡ್ ನೀಡಲು ತಿಳಿಸಿ, ಟಾಸ್ಕ್‌ಗಳನ್ನು ಪೂರ್ಣಗೊಳಿಸಲು ಹೇಳಲಾಯಿತು. ಹೀಗೆ, ಆಗಸ್ಟ್ 24 ರಿಂದ 27, 2025 ರವರೆಗೆ ಹಂತ-ಹಂತವಾಗಿ 5,70,000 ರೂಪಾಯಿಗಳನ್ನು ಆನ್‌ಲೈನ್‌ನಲ್ಲಿ ಪಡೆದುಕೊಂಡು ವಂಚನೆ ಮಾಡಲಾಗಿದೆ. ಈ ಬಗ್ಗೆ ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 94/2025, ಕಲಂ 316(2), 318(4), 112 BNS ಮತ್ತು 66(C), 66(D) IT Act ರಂತೆ ಪ್ರಕರಣ ದಾಖಲಾಗಿದೆ.