ಕುಂದಾಪುರ, ಸೆಪ್ಟೆಂಬರ್ 02, 2025: ಕುಂದಾಪುರ ತಾಲೂಕಿನ ಕಂದಾವರ ಗ್ರಾಮದ 2ನೇ ವಾರ್ಡಿನ ಪಂಚಾಯಿತಿ ಸದಸ್ಯರಾದ ದೂರುದಾರ ಅಭಿಜಿತ್ (36) ಅವರು ಸೆಪ್ಟೆಂಬರ್ 1, 2025ರಂದು ಸಂಜೆ 5 ಗಂಟೆ ಸುಮಾರಿಗೆ ಅಂಬೇಡ್ಕರ್ ಭವನದ ಎದುರು ವಿಠಲರಾಜ್ ಎಂಬವರ ಕುಟುಂಬದ ಹಾಡಿಯ ಮಧ್ಯಭಾಗದಲ್ಲಿ ಅಪರಿಚಿತ ಮೃತದೇಹವೊಂದು ಇರುವ ಬಗ್ಗೆ ಮಾಹಿತಿ ಬಂದಿರುವುದರಿಂದ ಸ್ಥಳಕ್ಕೆ ತೆರಳಿ ಪರಿಶೀಲಿಸಿದ್ದಾರೆ.

ಮೃತದೇಹವು ಕೊಳೆತ ಸ್ಥಿತಿಯಲ್ಲಿ ಕಂಡುಬಂದಿದ್ದು, ಚರ್ಮ ಮತ್ತು ಮಾಂಸ ಭಾಗಶಃ ಕಾಣಿಸದೆ, ಅಸ್ಥಿಪಂಜರವು ಮೇಲ್ನೋಟಕ್ಕೆ ಗೋಚರಿಸಿದೆ. ಒಂದು ಕಾಲಿನ ಮೂಳೆ ಸ್ವಲ್ಪ ದೂರದಲ್ಲಿ ಬಿದ್ದಿತ್ತು. ಮೃತದೇಹದ ಬಳಿ ‘ರಾಟೋ***ಕ್’ ಎಂಬ ಕೀಟನಾಶಕದ ಖಾಲಿ ಕವರ್ ಹಾಗೂ 500 ಎಂ.ಎಲ್. ನೀರಿನ ಬಾಟಲಿಯೊಂದು ಪತ್ತೆಯಾಗಿದೆ. ಮೃತದೇಹವು ಸುಮಾರು 30-40 ವರ್ಷ ವಯಸ್ಸಿನ ಗಂಡಸಿನದ್ದಾಗಿರಬಹುದೆಂದು ಅಂದಾಜಿಸಲಾಗಿದೆ.

ಮೃತದೇಹವನ್ನು ತನಿಖೆಗಾಗಿ ಮಣಿಪಾಲದ ಮಾರ್ಚರಿಗೆ ಸಾಗಿಸಲು 24×7 ಹೆಲ್ಪ್‌ಲೈನ್ ಆಂಬುಲೆನ್ಸ್‌ನ ಮೊಹಮ್ಮದ್ ಇಬ್ರಾಹಿಂ ಎಂ.ಎಚ್. ಗಂಗೊಳ್ಳಿ ಮತ್ತು ಅವರ ತಂಡದ ಸದಸ್ಯರಾದ ಬಬ್ಬಾ ಇಬ್ರಾಹಿಂ, ಅಬ್ರಾರ್ ಮತ್ತು ವಿಕಾಸ್ ಕುಂದಾಪುರ ಪೊಲೀಸರಿಗೆ ಸಹಾಯ ಮಾಡಿದ್ದಾರೆ. ಕುಂದಾಪುರ ಗ್ರಾಮಾಂತರ ಪೊಲೀಸರು ಈ ಘಟನೆಗೆ ಸಂಬಂಧಿಸಿ ಯುಡಿಆರ್ ಕ್ರಮಾಂಕ 30/2025ರಡಿ, BNSS ಕಲಂ 194(3)(iv) ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಪೊಲೀಸರು ತನಿಖೆಯನ್ನು ಆರಂಭಿಸಿದ್ದಾರೆ.