ಕುಂದಾಪುರ: ತಾಲೂಕಿನಲ್ಲಿ ಕಾಡುಹಂದಿಗಳ ಸರಣಿ ಸಾವು ಮತ್ತೆ ಮುಂದುವರಿದಿದ್ದು, ಸೋಮವಾರ ಹಕ್ಲಾಡಿ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಕುಂದಬಾರಂದಾಡಿಯ ಕೊಳೂರು ಹಾಗೂ ಹೇರೂರಿನ ರಾಗಿಹಕ್ಲು ಎಂಬಲ್ಲಿ ಎರಡು ಕಾಡು ಹಂದಿಗಳ ಮೃತದೇಹಗಳು ಪತ್ತೆಯಾಗಿವೆ.

ಕುಂದಬಾರಂದಾಡಿಯಲ್ಲಿ ಪತ್ತೆಯಾದ ಕಾಡು ಹಂದಿಯ ಮೃತದೇಹಕ್ಕೆ ಹೆಮ್ಮಾಡಿ ಪಶು ವೈದ್ಯಕೀಯ ಆಸ್ಪತ್ರೆಯ ಡಾ. ನಾಗರಾಜ್ ಅವರು ಅರಣ್ಯ ಇಲಾಖೆಯ ಸಿಬ್ಬಂದಿಯ ಸಹಕಾರದೊಂದಿಗೆ ಮರಣೋತ್ತರ ಪರೀಕ್ಷೆ ನಡೆಸಿದರು. ಇನ್ನು ಹೇರೂರಿನ ರಾಗಿಹಕ್ಲು ಎಂಬಲ್ಲಿ ಸಿಕ್ಕ ಕಾಡು ಹಂದಿಯ ಮರಣೋತ್ತರ ಪರೀಕ್ಷೆಯನ್ನು ಪಶುವೈದ್ಯಾಧಿಕಾರಿ ಡಾ. ಅರುಣ್ ಕುಮಾರ್ ವೈ.ಕೆ. ಅವರು ನಡೆಸಿದ್ದು, ಹಂದಿಗಳ ಮರಣೋತ್ತರ ಮಾದರಿಗಳನ್ನು (ಸ್ಯಾಂಪಲ್) ಸಂಗ್ರಹಿಸಿ ಹೆಚ್ಚಿನ ತಪಾಸಣೆ ಮತ್ತು ವರದಿಗಾಗಿ ಬೆಂಗಳೂರಿನ ಪ್ರಯೋಗಾಲಯಕ್ಕೆ ಕಳುಹಿಸಿಕೊಡಲಾಗಿದೆ.

ಇದಕ್ಕೂ ಮೊದಲು ತಾಲೂಕಿನ ವಿವಿಧೆಡೆ ಪತ್ತೆಯಾಗಿದ್ದ 2 ಕಾಡು ಹಂದಿಗಳು ಹಾಗೂ 1 ಸಾಕು ಹಂದಿಯ ಮೃತದೇಹಗಳ ಮರಣೋತ್ತರ ಪರೀಕ್ಷೆ ನಡೆಸಿ, ಸ್ಯಾಂಪಲ್‌ಗಳನ್ನು ಸಂಬಂಧಪಟ್ಟ ಪ್ರಯೋಗಾಲಯಕ್ಕೆ ಕಳುಹಿಸಿಕೊಡಲಾಗಿತ್ತು. ಆದರೆ ಆ ಪರೀಕ್ಷೆಯ ವರದಿ ಇನ್ನೂ ಕೈಸೇರಿಲ್ಲ. ಪ್ರಯೋಗಾಲಯದ ವರದಿ ಬಂದ ಬಳಿಕವಷ್ಟೇ ಈ ಭಾಗದಲ್ಲಿ ಕಾಡು ಹಂದಿಗಳು ಹಾಗೂ ಸಾಕು ಹಂದಿಗಳ ಸರಣಿ ಸಾವಿಗೆ ನಿಖರವಾದ ಕಾರಣ ಏನು ಎಂಬುದು ಸ್ಪಷ್ಟವಾಗಲಿದೆ ಎಂದು ಪಶುವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.

ಗಂಗೊಳ್ಳಿನ್ಯೂಸ್

ಕುಂದಾಪುರ: ಮತ್ತೆರಡು ಕಾಡು ಹಂದಿಗಳ ಶವ ಪತ್ತೆ