ಕೊಲ್ಲೂರು, ಸೆಪ್ಟೆಂಬರ್ 15, 2025: ಬೈಂದೂರಿನ ಜಡ್ಕಲ್ ಗ್ರಾಮದ ಹೊಸೂರು ಎಂಬಲ್ಲಿ ಆತ್ಮಹತ್ಯೆ ಶಂಕಿತ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಪಿರ್ಯಾದಿದಾರರಾದ ರವಿ @ ರವೀಶ್ (42) ಎಂಬುವವರು ದಿನಾಂಕ 14/09/2025 ರಂದು ಮಧ್ಯಾಹ್ನ 3:30 ಗಂಟೆಗೆ ತಮ್ಮ ದನಗಳನ್ನು ಹುಡುಕಲು ಹೋದಾಗ, ಬೆಳೆಕೋಡ್ಲು ರಸ್ತೆಯ ಸರಕಾರಿ ಹಾಡಿಯಲ್ಲಿ ಒಂದು ಪ್ಯಾಂಟ್, ಶರ್ಟ್, ಕೀ-ಪ್ಯಾಡ್ ಮೊಬೈಲ್, ಮತ್ತು ಒಂದು ಜೊತೆ ಚಪ್ಪಲಿಗಳನ್ನು ಕಂಡಿದ್ದಾರೆ.

ಸೂಕ್ಷ್ಮವಾಗಿ ಪರಿಶೀಲಿಸಿದಾಗ, ಅಲ್ಲಿಯೇ ಮೂಳೆಯ ತುಂಡುಗಳು ಬಿದ್ದಿರುವುದು ಕಂಡುಬಂದಿದೆ. ಹತ್ತಿರದ ಮರದಲ್ಲಿ ನೈಲಾನ್ ಹಗ್ಗವು ತುಂಡಾಗಿರುವುದನ್ನು ಗಮನಿಸಿದ್ದಾರೆ. ಪೊಲೀಸರ ತನಿಖೆಯ ಪ್ರಕಾರ, ಸುಮಾರು 2-3 ತಿಂಗಳ ಹಿಂದೆ ಯಾರೋ ವ್ಯಕ್ತಿಯು ಈ ಸ್ಥಳದಲ್ಲಿ ನೈಲಾನ್ ಹಗ್ಗವನ್ನು ಮರಕ್ಕೆ ಕಟ್ಟಿ, ಕುತ್ತಿಗೆಗೆ ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿರುವ ಸಾಧ್ಯತೆಯಿದೆ. ನಂತರ, ಹಗ್ಗ ಕಟ್ಟಾಗಿ ಶರೀರವು ಬಿದ್ದಿದ್ದು, ಕಾಡು ಪ್ರಾಣಿಗಳಾದ ಹಂದಿ ಮತ್ತು ಇತರ ಜೀವಿಗಳು ಮೃತದೇಹವನ್ನು ತಿಂದಿರುವ ಶಂಕೆ ವ್ಯಕ್ತವಾಗಿದೆ.

ಈ ಘಟನೆಯ ಕುರಿತು ಕೊಲ್ಲೂರು ಪೊಲೀಸ್ ಠಾಣೆಯಲ್ಲಿ ಯುಡಿಆರ್ ಕ್ರಮಾಂಕ 22/2025, ಕಲಂ 194(3)(iv) BNSS ರಂತೆ ಪ್ರಕರಣ ದಾಖಲಾಗಿದೆ. ಪೊಲೀಸರು ತನಿಖೆಯನ್ನು ಮುಂದುವರೆಸಿದ್ದಾರೆ.