ಉಡುಪಿ, ಆಗಸ್ಟ್ 25, 2025: ಉಡುಪಿ ನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಆಗಸ್ಟ್ 21, 2025ರಂದು ಸಂಜೆ 4:30 ಗಂಟೆಗೆ ಜಹೀನ್ ಆಯೇಶಾ (27) ಎಂಬ ಮಹಿಳೆಗೆ ಸೈಬರ್ ವಂಚನೆಗೆ ಸಂಬಂಧಿಸಿದ ಘಟನೆ ನಡೆದಿದೆ. ಅಪರಿಚಿತ ವ್ಯಕ್ತಿಯೊಬ್ಬ ಫೋನ್ ಕರೆ ಮಾಡಿ, ತಾನು ನೈಕಾ ಆನ್‌ಲೈನ್ ಶಾಪಿಂಗ್ ಕಂಪನಿಯಿಂದ ಮಾತನಾಡುತ್ತಿರುವುದಾಗಿ ಹೇಳಿ, ದೂರುದಾರರ ಆರ್ಡರ್‌ಗೆ ಸಂಬಂಧಿಸಿದಂತೆ ಪಿನ್‌ಕೋಡ್ ಸರಿಯಾಗಿ ನಮೂದಿಸದ ಕಾರಣ ಆರ್ಡರ್ ಸ್ಥಗಿತಗೊಂಡಿದೆ ಎಂದು ತಿಳಿಸಿದ್ದಾನೆ. ಆರ್ಡರ್ ಚಾಲ್ತಿಗೊಳಿಸಲು ಮೊದಲು ಹಣ ಪಾವತಿಸಬೇಕು ಮತ್ತು ಆ ಹಣವನ್ನು ಮರುಪಾವತಿ ಮಾಡಲಾಗುವುದು ಎಂದು ಆರೋಪಿಯು ನಂಬಿಸಿದ್ದಾನೆ.

ಆರೋಪಿಯ ಮಾತುಗಳನ್ನು ನಂಬಿದ ಜಹೀನ್ ಆಯೇಶಾ ಜಾಕೀರ್, ಆರೋಪಿಯು ನೀಡಿದ ಬ್ಯಾಂಕ್ ಖಾತೆಗೆ ಒಟ್ಟು 47,191.50 ರೂಪಾಯಿಗಳನ್ನು ಆನ್‌ಲೈನ್ ಮೂಲಕ ವರ್ಗಾಯಿಸಿದ್ದಾರೆ. ಆದರೆ, ಆರೋಪಿಯು ಯಾವುದೇ ಹಣವನ್ನು ಮರುಪಾವತಿ ಮಾಡದೆ, ದೂರುದಾರರನ್ನು ವಂಚಿಸಿದ್ದಾನೆ. ತಾವು ಸೈಬರ್ ವಂಚನೆಗೊಳಗಾದ ವಿಷಯ ದೂರುದಾರರಿಗೆ ತಿಳಿದುಬಂದಿದ್ದು, ಈ ಬಗ್ಗೆ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 158/2025, ಕಲಂ 318(4) BNS 2023 ಮತ್ತು ಕಲಂ 66(D) ಐಟಿ ಆಕ್ಟ್ 2000ರಡಿ ಪ್ರಕರಣ ದಾಖಲಾಗಿದೆ.