2026ರ ಜುಲೈ 30ರಂದು ರಾತ್ರಿ 11:45ರ ಸುಮಾರಿಗೆ ಹಣಕಾಸಿನ ವಿವಾದ ಹಾಗೂ ಚಿಟ್ ಫಂಡ್ ವ್ಯವಹಾರದ ಮಧ್ಯಸ್ಥಿಕೆ ವಿಚಾರಕ್ಕೆ ಸಂಬಂಧಿಸಿ ಆರೋಪಿ ಡೆರಿಕ್ ಕ್ರಾಸ್ತಾ, ಮೃತ ಐವನ್ ರಿಚರ್ಡ್ ಮಸ್ಕರೇನಸ್ ಅವರಿಗೆ ಕರೆ ಮಾಡಿದ್ದ ಎನ್ನಲಾಗಿದೆ. ಈ ವೇಳೆ ಇಬ್ಬರ ನಡುವೆ ತೀವ್ರ ಮಾತಿನ ಚಕಮಕಿ ನಡೆದು, ಕುಂದಾಪುರಕ್ಕೆ ಒಂಟಿಯಾಗಿ ಬರುವಂತೆ ಡೆರಿಕ್ ಸವಾಲು ಹಾಕಿದ್ದ. ನಂತರ ಜುಲೈ 31ರಂದು ನಸುಕಿನ ಜಾವ 1:30ಕ್ಕೆ ಡೆರಿಕ್ ತನ್ನ ಲೈವ್ ಲೊಕೇಶನ್ ಕಳುಹಿಸಿದ್ದ. ಅದರಂತೆ ಐವನ್ ರಿಚರ್ಡ್ ಅವರು ತಮ್ಮ ಕಾರಿನಲ್ಲಿ ಕುಂದಾಪುರದ ಹೋಲಿ ರೋಸರಿ ಚರ್ಚ್ ಎದುರಿನ ಕಾಂಕ್ರೀಟ್ ರಸ್ತೆಗೆ ತಲುಪಿದಾಗ, ಬೆಳಗಿನ ಜಾವ 3:15ಕ್ಕೆ ಕಪ್ಪು-ಕೆಂಪು ಬಣ್ಣದ ಮಹೀಂದ್ರಾ ಥಾರ್ ವಾಹನದಲ್ಲಿ ಬಂದ ಡೆರಿಕ್ ಕ್ರಾಸ್ತಾ, ರೈಫಲ್‌ನಿಂದ ಐವನ್ ಅವರ ಸೊಂಟದ ಕೆಳಭಾಗಕ್ಕೆ ಗುಂಡು ಹಾರಿಸಿ ಪರಾರಿಯಾಗಿದ್ದ. ತೀವ್ರ ರಕ್ತಸ್ರಾವದಿಂದ ಐವನ್ ಸ್ಥಳದಲ್ಲೇ ಮೃತಪಟ್ಟಿದ್ದರು.